Ang Pangulo ng Pilipinas na si Bongbong Marcos ay nagpahayag ng kahandaang makipag-ayos sa pamilyang Duterte. Sa isang podcast kasama si Anthony Taberna, tinanong siya kung bukas ba siyang maibalik ang magandang relasyon sa mga Duterte. Agad siyang sumagot, “Oo. Ayaw ko ng gulo. Gusto ko makasundo sa lahat. Mas maganda.”
Giit ni Marcos, mas kailangan niya ng kaibigan kaysa kaaway. “Marami na akong kaaway, hindi ko kailangan ng dagdag. Kailangan ko ng kaibigan,” ani niya. Para sa kanya, mahalaga ang kapayapaan at katatagan ng bansa upang magpatuloy ang trabaho ng gobyerno.
Bukas umano ang Pangulo sa anumang pag-uusap o pakikipagtulungan, kahit pa may hindi sila pagkakaintindihan sa ilang polisiya. “Lagi akong open. Pwede naman magkaiba ng paniniwala pero nagtutulungan pa rin,” dagdag niya.
Nangyari ang panayam isang linggo matapos ang midterm elections, kung saan anim lamang sa mga kandidato ni Marcos ang nanalo sa Senado. Ayon sa ilang grupo, naapektuhan ang resulta dahil sa impeachment ni VP Sara Duterte at pagkakaaresto kay dating Pangulong Rodrigo Duterte.
Ito ang unang beses na nagsalita si Marcos tungkol sa mga Duterte matapos kumpirmahin ang ICC arrest order laban sa dating pangulo. Dati na rin niyang sinabi na hindi pa sarado ang pintuan para sa pakikipag-ugnayan kay VP Sara. “Never say never,” ani Marcos noon.
