Ang barkong pandagat ng Mexican Navy na "Cuauhtémoc" ay bumangga sa kilalang Brooklyn Bridge sa New York nitong Sabado ng gabi, Mayo 17. Ayon kay Mayor Eric Adams, tinamaan ang tulay at naputol ang itaas ng mga palo ng barko, dahilan para masugatan ang 19 katao na sakay nito.
Habang papalapit sa tulay, kita sa mga video online ang barko na may kasamang malaking watawat at mga ilaw. Sa kasamaang-palad, masyadong mataas ang 147-foot na mga palo nito at hindi ito nakalampas sa arko ng tulay.
Ayon sa Mexican Navy, 22 katao ang nasugatan sa insidente at 19 sa kanila ay dinala sa ospital, tatlo ang nasa seryosong kondisyon. Wala namang nahulog sa tubig, kaya walang isinagawang rescue operations. Nakita rin ang ilang kadete na naka-uniporme ng puti na nakasabit sa mga beam ng barko matapos ang banggaan.
May kabuuang 277 sakay ang barko noong oras ng aksidente. Sabi ng pulisya, posible raw na may sira sa makina ng barko kaya ito nangyari, ngunit wala pang detalyeng inilabas.
Walang matinding pinsala sa Brooklyn Bridge, at agad na binuksan muli ang trapiko matapos ang paunang inspeksyon. Ang barkong Cuauhtémoc ay isang training ship na gawa sa Spain noong 1981, at bahagi ito ng pagbisita sa New York na inorganisa para sa publiko.
