Ang mga nanalong senador sa 2025 midterm elections ay opisyal nang naiproklama ngayong Sabado, Mayo 17. Pinangunahan ito ng Commission on Elections (Comelec) sa isang pormal na seremonya. Hindi nakadalo si Sen. Kiko Pangilinan dahil nasa Amerika para sa graduation ng kanyang anak, ngunit ang iba ay personal na tumanggap ng kanilang proklamasyon.
Bawat senador ay binigyan ng pagkakataong magbigay ng maikling mensahe, nagpapahayag ng pasasalamat at hangarin para sa mas magandang serbisyo. Ayon kay Comelec Chairman George Erwin Garcia, ang naging voter turnout na mahigit 82% ay pinakamataas sa kasaysayan ng bansa. Pinuri rin niya ang aktibong partisipasyon ng kabataan, na naging malaking bahagi ng eleksiyon.
Ani Garcia, malaki ang impluwensiya ng kabataang botante sa resulta ng halalan. Ipinakita raw nila ang kapangyarihang bumoto at pumili ng mga lider na nais nilang mamuno. Bagaman may ilang isyung lumutang gaya ng overvotes, tiniyak ng Comelec na naging maayos at malinis ang eleksiyon.
Ayon sa Comelec, bagaman hindi perpekto ang halalan, wala namang malalaking aberya ang naiulat. Sa huli, hinikayat ni Chairman Garcia ang mga bagong senador na magsulong ng mga reporma upang mas mapabuti pa ang halalan sa mga susunod na taon.
