Ang isang 86-anyos na lalaki na si Uncle Biao ay naging usap-usapan matapos niyang pakasalan ang 53-anyos na babae na dating kasintahan ng kanyang anak na namatay noong Pebrero dahil sa sakit sa atay. Ayon sa kanya, natagpuan niya ang "tunay na pag-ibig" sa piling ng babae na mas bata sa kanya ng 33 taon.
Magkasama sa iisang bahay sina Biao, ang kanyang anak, at si Wang bago pumanaw ang binata. Sa araw-araw na pagsasama, unti-unting nabuo ang kanilang ugnayan. Nang mamatay ang anak, nagpatuloy sa pagtira si Wang sa bahay ni Biao, hanggang sa nauwi sa kasalan ang lahat.
Isiniwalat ng anak na babae ni Biao na si Qin ang plano nitong ipadala ang ama sa nursing home at paupahan ang bahay. Dahil dito, sinasabing nagpakasal si Wang kay Biao upang pigilan ito. Ngunit agad itong pinabulaanan ni Biao at sinabing hindi siya hinihingian ng pera ni Wang at inaalagaan siya nito ng taos-puso.
“Tunay ang kanyang malasakit sa akin,” ani ni Biao. Dagdag pa niya, ipapamana niya ang kanyang ari-arian sa sinumang mag-aalaga sa kanya ng buong puso.
Ang bahay ay nakapangalan sa unang asawa ni Biao na pumanaw noong 2022. Para mailipat ang titulo, kinakailangan pa rin ng pahintulot mula sa anak niyang si Qin.