Bumaba ang ranking ng Pilipinas sa Corruption Perceptions Index (CPI) ngayong 2025, kasabay ng mga iskandalong kinasasangkutan ang flood control projects. Nasa ika-120 puwesto ang bansa sa 182 bansa, anim na puwesto ang pagbaba mula sa nakaraang taon, na nagpapakita ng pagtindi ng perceived corruption sa public sector.
Ayon sa ulat, nakakuha ang Pilipinas ng score na 32, isa lang ang pagbaba mula 2024 at pinakamababa mula noong ipinatupad ang kasalukuyang scoring system noong 2012. Sa Timog-Silangang Asya, mas mataas lamang ang scores ng Cambodia at Myanmar kumpara sa Pilipinas, na nagpapakita ng seryosong hamon sa transparency at governance.
Ang pagbaba ng score ay kaugnay ng mga malalaking iskandalo sa gobyerno, kabilang ang mga alegasyong multi-bilyong pisong katiwalian sa mga proyekto ng imprastruktura. Bagama’t ilang kaso na ang naihain, inaasahan pang dumami at maresolba sa mga susunod na buwan. Ayon sa Malacañang, inaasahan ang pagbaba ng score dahil sa paglantad ng mga anomalya sa flood control projects.
Bilang tugon sa lumalalang sitwasyon, inilunsad ng DPWH ang Integrity Chain gamit ang blockchain technology upang mapabuti ang transparency at auditability ng mga proyekto. Ayon kay DPWH Secretary Vince Dizon, layunin nitong maiwasan ang pag-uulit ng nakaraang katiwalian at masiguro ang pananagutan sa gobyerno.
Sa kabila ng mga hamon, binigyang-diin ng Transparency International na hindi kailangan maging inevitable ang corruption. May malinaw na blueprint para sa pagsusulong ng accountability at integridad, mula sa demokratikong proseso hanggang sa malayang civil society, upang masiguro ang mas maayos na kinabukasan para sa mamamayan.