Ayon sa isang non-profit organization, ang political dynasties ay isa sa mga dahilan ng lumalalang problema sa flood control sa Pilipinas. Sa isang pagdinig ng Senate Committee on Electoral Reforms, tinalakay ang anim na panukalang batas laban sa political dynasties at ang mga negatibong epekto nito, kabilang ang pagbabalewala sa accountability at pagiging ugat ng korapsyon.
Ayon kay Atty. Michaela Defensor, co-convenor ng Anti-Dynasty Network (ADN), nagdudulot ang political dynasties ng pagka-buwag ng checks and balances sa mga proyekto. “Makikita natin ito sa flood control crisis. Kapag ang nagbibigay ng pondo at ang nagpapatupad ng proyekto ay magkakamag-anak, nawawala ang tamang audit at napapalitan ng conflict of interest,” paliwanag niya.
Sinabi naman ni Senate Deputy Majority Floor Leader Risa Hontiveros na ang political dynasties ay nagpapahina sa checks and balances, lalo na sa pamamahala ng pampublikong pondo. Dagdag niya, ang mga multi-billion peso flood control scam, lumalalang kahirapan, at mga patayan tuwing eleksyon ay konektado sa pinalalakas ng political dynasties.
Ipinakita rin ng pag-aaral ng ADN na sa 20th Congress, 76% ng mga miyembro ng House of Representatives at 83% ng mga senador ay nagmula sa mga dynastic political families. Ayon kay Dr. Carmel Abao, co-convenor ng ADN, pinipigilan ng mga dynasty ang pagpasok ng mga bagong lider sa pamahalaan, kaya’t lumalabo ang tunay na demokrasya sa bansa.
Sa pagdinig, iminungkahi ng mga eksperto ang anti-political dynasty bill na sumasaklaw hanggang sa barangay level at naglilimita sa second-degree consanguinity, kabilang ang mga asawa, anak, at kapatid. Layunin nitong itaguyod ang tunay na accountability at bigyan ng pagkakataon ang mga kakayahang Pilipino na magsilbi sa gobyerno, nang hindi lamang nakabase sa kanilang apelyido o koneksyon.
