Ang P55 milyong flood control project sa Bulacan ay natuklasan ni Pangulong Marcos Jr. bilang isang ghost project. Sa kanyang inspeksyon sa Baliuag, wala siyang nakita ni isang hollow block o semento, kahit pa sinabing tapos na raw ang proyekto. Galit ang Pangulo at nagbanta ng mabibigat na kaso laban sa mga opisyal at contractor na sangkot.
Ayon kay Marcos, may palsipikasyon ng dokumento dahil idineklara na kumpleto ang proyekto kahit wala namang nagawa. Ipinahayag niya na posibleng patawan ng economic sabotage ang mga nasa likod nito at agad ipapablacklist ang kumpanyang SYMS Construction Trading.
Dagdag pa ng Pangulo, dapat itigil ang gawain ng mga contractor na nagbebenta ng kontrata at iniiwan ang proyekto sa mga sub-contractor. Dahil dito, marami ang nagiging substandard o hindi natatapos na proyekto. Hinimok din niya ang publiko na magsumbong ng mga anomalya sa mga proyekto ng gobyerno upang masiguro na ang pera ng bayan ay mapupunta sa totoong proyekto.
Sa ulat, lumabas na may higit 6,000 flood control projects na walang malinaw na detalye kung ano ang sakop ng konstruksyon. Mayroon ding mga proyekto na pare-pareho ang halaga ng kontrata kahit magkakaibang lugar, at marami sa mga probinsiyang hindi flood-prone ang nabibigyan ng mas maraming proyekto.
Ipinangako ni Marcos na tuloy-tuloy ang imbestigasyon at pananagutin ang lahat ng mapapatunayang sangkot sa ghost at anomalous projects. “Hindi natin ito palalagpasin,” diin ng Pangulo.