Ang Pangalawang Pangulo na si Sara Duterte ay humiling sa Senado na itigil ang impeachment case laban sa kanya. Sa kanyang sagot, sinabi ni Duterte na nilalabag ng reklamo ang One-Year Bar Rule sa ilalim ng Saligang Batas ng 1987, na nagsasabing hindi pwedeng magsimula ng higit sa isang impeachment case sa loob ng isang taon laban sa iisang opisyal.
Ayon sa dokumentong isinumite niya, ang ika-apat na reklamo ay dapat ibasura dahil ito ay "void ab initio" o walang bisa mula simula. Ang kopya ng kanyang sagot ay tinanggap ng Kongreso at Senado nitong Lunes ng hapon, ayon sa tagapagsalita ng Kamara na si Princess Abante at sa Senate secretariat.
May limang araw ang mga taga-usig ng Kamara para magsumite ng kanilang tugon. Dahil ang Hunyo 28 ay Sabado, maaari nila itong ihain hanggang Lunes, Hunyo 30.
Sinabi pa ni Duterte na kahit hindi inaksyunan o pinadala sa komite ng katarungan, ang unang tatlong reklamo ay dapat pa ring ituring na nagsimula nang pormal. Idinagdag niya na ang reklamo ay walang sapat na batayan at tinawag niya itong "scrap of paper."
Matatandaang na-impeach si Duterte noong Pebrero dahil sa mga alegasyong may kinalaman sa pagtataksil sa tiwala ng bayan, paglabag sa Konstitusyon, graft and corruption, at iba pang malalalang krimen na may kaugnayan sa umano’y maling paggamit ng P600 milyon confidential funds. Wala pang petsa ang paglilitis dahil ibinalik muna ng Senado sa Kamara ang impeachment articles bago mag-adjourn ang ika-19 na Kongreso.
