Nilinaw ng Bureau of Jail Management and Penology (BJMP) na ang mga larawan ni Russian vlogger Vitaly Zdorovetskiy na nag-sisigarilyo habang nasa kustodiya ay hindi kuha sa kanilang pasilidad. Ayon sa BJMP, striktong ipinagbabawal ang paggamit ng mobile phones at ibang gadgets sa loob ng kanilang mga pasilidad.
Dagdag pa ng ahensya, ang mga litrato na ipinost ni Zdorovetskiy sa social media ay kuha sa mga authorized Welfare and Development Programs, tulad ng supervised Bible study, at hindi sa aktwal na selda. Binanggit din nila na si Zdorovetskiy ay nanatili lamang sa kustodiya ng BJMP ng pitong araw mula Hunyo 11–18, 2025.
“Nanatiling committed ang BJMP sa seguridad, disiplina, at integridad ng rehabilitation programs nito,” ayon sa ahensya. Ang vlogger ay naaresto dahil sa umano’y pananakot sa publiko para sa content. Matapos ang kanyang detensyon, siya ay deported sa Russia at blacklisted sa pagbalik sa Pilipinas.
Sa kanyang post, inilarawan ni Zdorovetskiy ang kanyang karanasan: “Matapos ang 290 araw sa Philippine jail kasama ang daga, ipis, at init na +35 Celsius, ako ay malaya na.” Ipinahayag niya rin, “Sinubukan talaga nila akong wasakin, pero ito rin ang bumuo sa akin.” Ayon sa kanya, nag-spend siya ng 91 araw sa kumpletong isolation.
Bilang pagtatapos, sinabi ng vlogger: “Gusto nila akong mawala, pero narito ako—all glory to GOD.” Ang karanasang ito ay nagpakita ng kanyang katatagan at pananampalataya sa gitna ng hamon sa detensyon sa ibang bansa.
