Ang PhilHealth ay makakatanggap ng DAGDAG NA P16.5 BILYON matapos aprubahan ng BICAMERAL CONFERENCE COMMITTEE ang paglipat ng pondo mula sa DPWH. Dahil dito, umabot sa P129.76 BILYON ang kabuuang budget ng PhilHealth para sa 2026, mula sa zero subsidy noong 2025.
Kasama sa inaprubahang halaga ang P53.13 BILYON para sa NATIONAL HEALTH INSURANCE PROGRAM at ang naibalik na P60 BILYON na maling nailipat sa national treasury noong 2024. Ayon kay SEN. SHERWIN GATCHALIAN, nagkaroon ng P20.7 BILYON NA TIPID matapos i-recompute ang gastos sa mga proyekto ng DPWH.
Sinabi ni SEN. LOREN LEGARDA na ang P16.5 BILYON ay base sa kakulangan ng pondo mula sa SIN TAX, na dapat talagang napupunta sa PhilHealth ayon sa batas. Dagdag niya, ito raw ang unang beses na tama at sapat ang budget ng PhilHealth batay sa tamang computation.
Nagkaroon ng isyu ang PhilHealth budget noong mga nakaraang taon dahil sa tinawag na “excess funds.” Ngunit ayon sa SUPREME COURT, walang “unused excess funds” at ang pondo ay dapat gamitin para sa MAS MAGANDANG BENEPISYO at MAS MABABANG KONTRIBUSYON ng mga miyembro.
Bukod sa PhilHealth, nadagdagan din ng P4.2 BILYON ang NATIONAL DISASTER RISK REDUCTION FUND. Habang aprubado na ang DPWH budget, hindi pa malinaw kung magkano ang final na matatanggap nito matapos ang mga binawas na halaga.