Ang PhilHealth ay nagpaalala sa publiko na ang mga may sintomas ng dengue ay dapat agad magpatingin sa doktor at hindi dapat mangamba sa gastusin. Tiniyak ng ahensya na saklaw pa rin ng kanilang benepisyo ang gamutan.
Ayon sa PhilHealth, may P19,500 na benepisyo para sa dengue fever at P47,000 naman para sa severe dengue. Layunin nitong matulungan ang mga pasyente at kanilang pamilya na mabawasan ang gastusin sa ospital.
Inaasahang tataas pa ang mga kaso ng dengue matapos ang pananalasa ng Bagyong Tino at Uwan. Dahil dito, mas pinaigting ang paalala ng ahensya na maging maagap sa paghingi ng tulong medikal.
Batay sa datos ng Department of Health, umabot na sa 14,000 kaso ng dengue mula Oktubre 12 hanggang 25. Patuloy na mino-monitor ng mga eksperto ang pagtaas nito sa iba’t ibang rehiyon.
Nagpahayag din ang PhilHealth na huwag mag-atubiling magpagamot. Ayon sa kanila, mas ligtas kung agad maaagapan ang sintomas upang maiwasan ang severe dengue at iba pang komplikasyon.
