Ang dalawang Pinay na biktima ng human trafficking ay ligtas na nakauwi sa Pilipinas matapos ma-aresto at ma-detain sa Malaysia nang apat na buwan. Dumating sila kamakailan sa NAIA.
Sinabi ng Bureau of Immigration na umalis ang dalawang babae noong Hunyo 30 gamit ang tinatawag na backdoor exit, o illegal na ruta mula Zamboanga hanggang Tawi-Tawi. Dahil dito, hindi sila dumaan sa tamang proseso.
Pagdating nila sa Malaysia, dinala umano sila sa isang hotel kung saan sila inaresto dahil sa paglabag sa immigration laws. Ayon sa kanila, sila ay na-recruit para magtrabaho sa Cambodia ngunit nauwi sa problema.
Binigyang-diin ni Immigration Commissioner Joel Anthony Viado na ang pag-alis nang walang tamang papeles ay may malaking panganib. Aniya, ang illegal departures ay madalas humantong sa pagka-aresto, pagsasamantala, o deportation pabalik ng Pilipinas.
Ang insidenteng ito ay paalala sa lahat na mas ligtas at mas tama ang pagtrabaho abroad kung dadaan sa legal na proseso at tamang ahensya.
