Ang Senado ay naglaan ng P62.6 bilyon upang palakasin ang Zero Balance Billing (ZBB) Program ng Department of Health sa susunod na taon. Ayon kay Sen. Sherwin Gatchalian, humigit-kumulang 18 milyong Pilipino ang makikinabang sa mas malaking pondo.
Sa orihinal na panukala, P53.3 bilyon lamang ang inilaan para sa ZBB at inaasahang sasapat para sa 16 milyong pasyente sa mga pagamutan na pinapatakbo ng DOH. Nagdagdag ang Senado ng P9.3 bilyon sa budget ng mga ospital upang madagdagan pa ang saklaw ng serbisyo ng dalawang milyong pasyente.
Sakop ng ZBB program ang lahat ng gastusin ng pasyenteng naka-admit sa basic o ward accommodation, kabilang ang room charges, laboratory tests, professional fees, at iba pang bayarin—kahit ano pa ang estado ng buhay ng pasyente.
Ayon kay Gatchalian, ang karagdagang pondo para sa Zero Balance Billing ay hakbang para mapanatili ang mas ligtas at mas malusog na mga komunidad.
Naglaan din ang Senado ng P1 bilyon sa bawat specialty hospital upang mas mapatibay ang pagpapatupad ng ZBB. Kabilang dito ang Lung Center of the Philippines, Philippine Heart Center, National Kidney and Transplant Institute, at Philippine Children’s Medical Center.