Ang K-pop group na ENHYPEN ay magdadala ng kakaibang virtual reality concert sa Manila ngayong Nobyembre. Pinamagatang “ENHYPEN VR Concert: Immersion,” gaganapin ito sa Gateway Cineplex mula Nobyembre 20 hanggang Disyembre 6.
Magsisimula ang bentahan ng ticket sa Nobyembre 8, alas-12 ng tanghali sa opisyal na website ng Gateway Immersive. Ang presyo ng ticket ay tinatayang ₱2,000 bawat isa.
Sa concert na ito, para kang nasa harap mismo ng grupo dahil sa 360-degree na VR experience. Mayroon din itong interactive effects tulad ng paglabas ng “heart” sa screen kapag gumawa ng heart-hand gesture ang manonood. Pwede ring pumili ng sinong miyembro ang gusto mong makita sa screen.
Ang ENHYPEN ay binubuo nina Jungwon, Heeseung, Jay, Jake, Sunghoon, Sunoo, at Ni-Ki. Kilala sila sa mga kantang “Polaroid Love,” “Bite Me,” at “Bad Desire (With or Without You).”
Simula nang mag-debut noong 2020, patuloy na lumalawak ang fandom ng ENHYPEN sa buong mundo. Sa kanilang VR concert, layunin nilang dalhin ang bagong paraan ng K-pop performance na siguradong magugustuhan ng mga ENGENE sa Pilipinas.
