Ang 54-anyos na UV Express driver ay mahaharap sa patong-patong na kaso matapos makabangga ng 13 motorsiklo at isang kotse sa Commonwealth Avenue noong Oktubre 17. Sa insidente, 1 ang patay at 7 ang sugatan, kabilang ang isang estudyante.
Wasak ang UV Express at sumabog ang gulong matapos paulit-ulit na bumangga. Sa kuha ng CCTV, makikitang tuloy-tuloy sa pagtakbo ang sasakyan kahit may nakaladkad na motorsiklo. Ayon sa mga saksi, intensyonal ang pangyayari dahil tatlong beses itong umikot bago huminto.
Isa sa mga nasawi ay 34-anyos na delivery rider mula Quezon City. Ayon sa pamilya, walang pagsisisi ang driver. Pitong iba pa ang nagtamo ng sugat. Nakakulong na ngayon ang suspek at humingi ng paumanhin ngunit iginiit ng asawa na may iniinom itong gamot para sa altapresyon at hika.
Isinasailalim sa drug test ang driver upang alamin kung nakagamit ng ilegal na droga. Kabilang sa posibleng kaso ay Reckless Imprudence Resulting in Homicide, Multiple Physical Injuries, Multiple Damage to Properties, at Frustrated Homicide.
Naglabas ng desisyon ang Department of Transportation na habambuhay nang kanselado ang lisensya ng driver. Sinuspinde rin ang operasyon ng UV Express na sangkot sa aksidente, at pinadalhan ng show-cause order ang operator upang magpaliwanag.
