Ang dalawang Filipina domestic worker na sina Imee Mahilum Pabuaya (24) at Aleli Perez Tibay (33) ay nawawala mula Oktubre 4. Huling nakita sila sa CCTV sa Yeung Uk Road, Tsuen Wan.
May isang hiker na nagsabing nakita raw ang dalawa bandang 4:30 pm sa Fu Yang Shan barbecue site, malapit sa Tsuen Wan MTR station. Ayon sa ilang kakilala, ang dalawa ay magka-relasyon at may kinuha umanong ₱560,000 loan (katumbas ng HK$80,000). Sinabi ng kapatid ni Tibay na may ibang tao ang gumamit ng pera at biglang nawala.
Ayon kay Vice Consul George Soriano, wala pa silang konkretong impormasyon kung nasaan ang dalawa, kahit may nagsabing lumipad daw sila papuntang Poland para magtrabaho. “Sa ngayon, puro haka-haka pa lang,” sabi niya.
Si Pabuaya ay may taas na 1.55m, timbang 50kg, bilugan ang mukha, maputi, at may maikling brown na buhok. Suot niya noon ay dark blue denim top, shorts, at puting sapatos. Si Tibay naman ay may taas na 1.58m, timbang din na 50kg, slim build, bilugan din ang mukha, maputi, at may mahabang itim na buhok. Suot niya ay light blue long-sleeved shirt, jeans, at puting sapatos.
Kung may impormasyon tungkol sa kanila, maaaring tumawag sa 2860 1040 / 9886 0034 o mag-email sa rmpu-hki@police.gov.hk, o lumapit sa pinakamalapit na police station.