Ang Daihatsu ang nangunguna sa 2025 Japan Initial Quality Study matapos makuha ang pinakamababang bilang ng problema sa mga bagong sasakyan. Nakapagtala sila ng 114 PP100 (problema kada 100 sasakyan), dahilan para makuha nila ang unang pwesto. Sumunod dito ang Suzuki na may 120 PP100 at Honda na may 134 PP100.
Ngayong taon, mas bumuti ang kalidad ng sasakyan matapos ang apat na sunod na taon ng pagtaas ng mga problema. Mula sa average na 152 PP100 noong 2024, bumaba ito ngayong 2025 sa 140 PP100. Ibig sabihin, mas kaunti na ang reklamo ng mga may-ari ng bagong sasakyan sa unang ilang buwan ng paggamit.
Pinakamadalas ireklamo ang mga design-related problems tulad ng mga features na mahirap intindihin o gamitin, na umabot sa 108.5 PP100. Kahit bumuti ito kumpara noong 2024, nananatili pa ring pangunahing isyu. Isa sa mga simpleng problema na madalas ireklamo ay ang cupholders, dahil sa hindi maganda ang pwesto o mahirap gamitin sa araw-araw.
Sa siyam na kategorya ng pag-aaral, infotainment system pa rin ang pinaka-problemado na may 28.7 PP100, bagama’t bumaba ito mula sa nakaraang taon. Nagpakita rin ng kaunting pagbuti ang mga safety features gaya ng lane departure warning, na ngayon ay nasa 3.6 PP100.
Buod ng 2025 Initial Quality Ranking (mas mababa, mas maganda):
Daihatsu – 114 PP100
Suzuki – 120 PP100
Honda – 134 PP100
Subaru – 134 PP100
Mitsubishi – 136 PP100
Nissan – 144 PP100
Mazda – 147 PP100
Lexus – 151 PP100
Toyota – 151 PP100
Mercedes-Benz – 164 PP100
BMW – 185 PP100
Volkswagen – 210 PP100
Sa madaling salita, mas kaunti ang problema ng mga Japanese car brands kumpara sa iba, at patunay ito na patuloy nilang pinapabuti ang kalidad ng mga bagong sasakyan sa merkado.
