Ang pulisya sa Datu Odin Sinsuat, Cotabato City ay nakahuli ng isang lalaki na pumatay at nagnakaw sa isang motorcycle crash victim imbes na tulungan ito. Kinilala ang suspek na si Palao Bangon Mlok, na nahuli sa kanyang taguan sa Barangay Bitu.
Ayon sa imbestigasyon, humingi ng tulong ang biktimang si Daniel Datulayta, isang construction worker, matapos siyang maaksidente habang pauwi sa Barangay Kalawag 2, Sultan Kudarat. Sa halip na tulungan, pinatay siya ni Mlok gamit ang itak at itinago ang bangkay sa liblib na lugar. Nakuha rin ng suspek ang pera at gamit ng biktima.
Dalawa pang kasamahan ni Mlok ang nadakip ngunit hindi muna pinangalanan dahil patuloy ang imbestigasyon. Ayon sa pulisya, nangako ang dalawa na tutulong para mapatibay ang kaso laban sa suspek.
Lumabas sa background check na matagal nang sangkot si Mlok sa illegal na droga at nakatakas sa ilang operasyon ng pulis sa nakalipas na dalawang taon. Inilarawan din siya ng kanyang mga kapitbahay bilang isang adik.
Kahapon, sama-samang hinukay ng mga pulis, residente, at mga Muslim elders ang bangkay ni Datulayta at ibinalik ito sa kanyang pamilya para sa maayos na libing.
