Ang isang ama at anak na hinihinalang tulak ng shabu ay napatay matapos manlaban sa pulis sa isang buy-bust operation sa Barangay Bongued, Datu Odin Sinsuat, Maguindanao del Norte nitong Lunes ng hapon.
Kinilala ang mga nasawi na sina Mandangan Noden, 52-anyos, at anak niyang si Iverson Noden, 29-anyos. Nakuha mula sa kanila ang humigit-kumulang P1.6 milyon halaga ng shabu, kasama ang dalawang baril na M16 rifle at M14 rifle.
Ayon sa pulisya, matagumpay na naisagawa ang operasyon sa tulong ng lokal na pamahalaan. Ngunit nauwi ito sa engkuwentro matapos umanong manlaban ang mag-ama sa mga awtoridad.
Samantala, sumuko naman ang isa pang anak na si Daboy Noden, 18-anyos, matapos makita ang kanyang ama at kuya na parehong nasawi sa bakbakan.
