Ang P20 bilyon ay inilaan ng Department of Budget and Management (DBM) sa proposed 2026 national budget para sa Zero Balance Billing (ZBB) program ng Department of Health (DOH). Layunin nitong matulungan ang mga indigent patients o mahihirap na pasyente.
Ayon kay Budget Secretary Amenah Pangandaman, kasama sa pondong ito ang bayad sa room at board, gamot, at medical tests sa mga pampublikong ospital. Sagot ng PhilHealth ang lahat ng covered expenses kaya’t wala nang babayaran ang pasyente.
Sinabi ni Special Assistant to the President Frederick Go na ang halagang ito ay tinantiya ng DOH para maisakatuparan ang ZBB program. Ngunit ayon kay Senador Bam Aquino, kulang ang P20 bilyon dahil matagal na sanang naipatupad ang programa kung sapat na ito.
Para sa susunod na taon, tataas din ng P6 bilyon ang kabuuang pondo ng DOH na aabot sa P253.5 bilyon mula sa kasalukuyang P247.5 bilyon. Bukod dito, may P53.2 bilyon subsidy din para sa PhilHealth matapos na walang pondong inilaan ngayong 2025 dahil sa malaking natitirang pondo ng ahensya.
Batay sa datos ng DOF, inaasahang aabot sa P348 bilyon ang natitirang pondo ng PhilHealth sa pagtatapos ng 2025. Ang dagdag na subsidy ay magsisilbing suporta para sa pagpapatuloy ng libreng serbisyong medikal sa ilalim ng ZBB.
