Ang pansamantalang Mayor ng Davao City na si Sebastian “Baste” Duterte ay nanawagan sa mga taga-suporta ng kanyang ama, si dating Pangulong Rodrigo Duterte, na dumalo sa ICC hearing sa The Hague sa darating na Setyembre 23.
Ayon kay Baste, mahalaga ang presensya ng mga taga-suporta sa araw ng confirmation of charges hearing upang ipakita na nananatili ang tiwala at suporta ng taumbayan.
“Magkita-kita tayo dito. Ipakita natin ang suporta natin, gaya ng napatunayan noong 2016 elections at sa nakaraang halalan. Kung hahamunin tayo ng protesta, tatanggapin din natin ang hamon na iyon,” ani Baste sa isang panayam.
Dagdag pa niya, “Ipunin natin ang ating sarili nang mapayapa at ipakita ang buong suporta natin sa dating Pangulo Rodrigo Roa Duterte.”
Ang panawagan ni Baste ay layong palakasin ang moral ng mga taga-suporta at maipakita sa buong mundo na hindi nag-iisa si dating Pangulong Duterte sa kanyang kinakaharap na kaso sa International Criminal Court.
