Ang isang 59-anyos na lalaki, tinukoy bilang Efren, ay patay matapos pagbabarilin sa labas ng simbahan sa Circumferential Road, Brgy. Taculing, Bacolod City kamakalawa.
Base sa report ng pulisya, kalalabas lamang ng biktima sa simbahan nang huminto ang isang itim na SUV malapit sa kanya. Ilang saglit, pinagbabaril siya ng salarin at agad na tumakas.
Nagtamo si Efren ng anim na tama ng bala sa katawan at namatay kaagad. Wala namang nasaktan na mga deboto dahil nasa loob pa sila ng simbahan nang mangyari ang insidente.
Sinusuri na ngayon ng mga awtoridad ang CCTV footage para matukoy at maaresto ang suspek. Nabatid na ang biktima ay driver sa simbahan at patuloy pang iniimbestigahan ang motibo ng krimen.
