Ang dalawang Chinese na negosyante, alyas “Wang”, 43, mula Brgy. Santol, Bulacan at alyas “Yang”, 52, mula Binondo, Maynila, ay arestado sa Valenzuela City. Napag-alaman na nagsabwatang magpanggap na biktima ng carnapping para makakuha ng insurance.
Ayon sa pulisya, na-report na kinarnap ang Toyota Fortuner ni “Wang” noong Agosto 17 sa harap ng Jade Garden Subdivision sa Brgy. Marulas, Valenzuela. Sa imbestigasyon, lumabas na nasangkot pala sa aksidente sa trapiko ang SUV at nasa auto repair shop sa Caloocan City.
Nitong Agosto 21, nakita si “Yang” na sakay ng isa ring Toyota Fortuner gamit ang plaka ng SUV ni “Wang” na iniulat na kinarnap. Napag-alaman na pag-aari rin ni “Wang” ang sasakyan na minamaneho ni “Yang” at sabwatan ang dalawa upang makakuha ng insurance.
Ang dalawa ay haharap sa kasong perjury, illegal transfer of license plates, at insurance fraud sa Valenzuela City Prosecutor’s Office. Pinaghahandaan ng pulisya ang tamang proseso para sa pag-akusa sa kanilang ginawang panlilinlang.
