Ang isang lalaki sa New South Wales, Australia ay arestado matapos umanong ikadena ang kanyang nobya sa kama para hindi ito “makalabas at makipagrelasyon sa iba.” Ayon sa pulisya, nagsimula ang insidente nitong Hunyo o Hulyo.
Ang biktima, 32 taong gulang, ay madalas nakakadena at tinatanggalan lang ng tanikala para kumain o gumamit ng banyo. May mga pagkakataon na hindi rin siya pinapayagang gumamit ng palikuran. Kinuha rin ng lalaki ang kanyang cellphone, pitaka, at susi, at iniwas siya sa pamilya, kaibigan, at trabaho.
Ginamit ng suspek ang isang mabigat na metal chain na nakakabit sa paa ng babae at pinadlock sa kama. Noong Agosto 5, nakatakas ang biktima habang nasa labas para mag-check ng balanse sa ATM. Tumakbo siya sa isang botika para humingi ng tulong at dinala sa ospital kung saan natuklasan na may basag na tadyang, pasa, at fractured na mata.
Naaresto ang suspek noong Agosto 6 at sinampahan ng ilang kasong may kinalaman sa domestic violence kabilang ang kidnapping at pananakit. Siya ay hindi pinayagang magpiyansa. Ayon sa pulisya, may dating record ito ng karahasan sa relasyon.
Ang abogado ng suspek ay nagsabing itinanggi ng kanyang kliyente ang mga paratang at binanggit na ito ay may mental health issues. Ayon naman sa ina ng lalaki, maayos umano ang relasyon ng magkasintahan. Nakatakda ang suspek na humarap sa korte sa Oktubre 8.
