Ang mga Swifties ay may bagong aabangan dahil inanunsyo ni Taylor Swift ang kanyang ika-12 album na pinamagatang The Life of a Showgirl.
Sa isang maikling video na ibinahagi niya sa Instagram, makikita si Taylor na nagbubukas ng kahong may “TS” logo. Pagkatapos ay ipinakita niya ang bagong album at ibinunyag ang title nito. Nakasaad sa caption, “Posted at 12:12 on the 12th. ❤️🔥 Tay’s 12th album is called… pre-order now.”
Sa kanyang official website, makikita ang mga blurred na larawan na may lock symbol, na tila itinatago muna ang opisyal na album artwork. Maaari nang mag-pre-order ng vinyl, cassette, at CD na may kasamang poster. Presyo sa US ay $29.99 para sa vinyl na katumbas ng humigit-kumulang ₱1,700.
Inanunsyo rin na lalabas siya sa podcast ng magkapatid na Kelce na ilalabas sa Agosto 13, 7 p.m. ET (Agosto 14, 7 a.m. sa Pilipinas). Sa loob lamang ng dalawang oras mula nang i-post, umabot na sa higit 1.2 milyon ang likes.
Sa ngayon, wala pang dagdag na detalye tungkol sa petsa ng opisyal na paglulunsad ng album. Pero malinaw na sobrang excited na ang mga fans sa bagong yugto ng musika ni Taylor Swift.
