Ang insidente ay nangyari sa Lipa City, Batangas kung saan isang babae ang natagpuang walang malay sa loob ng tricycle sa Villa Beatriz Subdivision, Barangay Tambo. Ayon sa mga pulis, bandang 7:30 a.m., nakita ang biktima na may malalang pasa sa mukha at iba pang bahagi ng katawan. Agad siyang dinala sa ospital ngunit binawian ng buhay makalipas ang ilang oras.
Base sa autopsy, ang sanhi ng pagkamatay ay matinding pambubugbog. Nakita sa CCTV na lumabas ang biktima mula sa isang bahay bandang 2:00 a.m., hirap maglakad, at naupo sa kalsada malapit sa lugar kung saan siya natagpuan. Sa iba pang footage, makikitang magkasama ang biktima at isang lalaki bago sila sumakay ng tricycle.
Kinilala ang lalaki na may-ari ng bahay na pinanggalingan ng biktima. Natagpuan din sa loob ng bahay ang damit na panloob ng babae. Inaresto ang lalaki at umamin sa krimen. Ayon sa kanya, nagkaroon sila ng alitan matapos umanong magkasundo para sa “sexual services.” Sinabi ng suspek na natulak niya ang biktima at nabagok ito, at nang magtalo muli, mas lalo niya itong nasaktan.
Kinilala ng pamilya ang biktima matapos makita ang mga litrato. Ayon sa kapatid, apat na taon na silang hindi nagkikita at tanging sa chat lang nag-uusap. May anim na anak ang biktima, apat sa probinsya at dalawa pang maliliit. Dahil sa kakulangan ng pera, nagpasya ang pamilya na huwag nang ipahukay ang labi at maglalagay na lang ng lapida kapag may sapat na pondo.
Nahaharap sa kasong murder ang suspek, habang iniimbestigahan pa kung nagkaroon ng sexual assault.
