Hi po, tawagin n’yo na lang akong May, 37 years old. Gusto ko lang ilabas ang bigat na nararamdaman ko ngayon at humingi ng payo. Limang taon na kaming magkasama ng partner ko. Live-in partner kami, hindi kami kasal, pero para sa akin, buo na ang pamilya namin. May anak ako sa dati kong relasyon at tinanggap naman niya iyon. Sa loob ng limang taon, masasabi kong maayos ang relasyon namin. Wala kaming naging malaking away, lalo na tungkol sa selos. Wala talaga. Mahal na mahal ko siya at ramdam ko rin na mahal niya ako. Kaya hindi ko akalaing darating ako sa ganitong sitwasyon.
Alam n’yo ba kung ano ang nangyari? Nalaman ko na engaged na pala siya sa iba—noong May pa. At ang mas masakit, ngayong Nobyembre na raw ang kasal nila. Alam mo ‘yung pakiramdam na parang bigla kang iniwan sa ere? Hindi ko alam kung paano ko haharapin ang ganito. Ang sabi niya, gusto lang daw ng pamilya niya dahil mayaman yung babae. Parang napakababaw, pero ganun talaga daw sa kanila. Hindi ko alam kung maiintindihan ko ba o mas lalong masasaktan ako.
Sobra akong naguguluhan ngayon. Limang taon naming pinagsamahan, lahat ng plano namin, parang bigla na lang nabura. Hindi ko alam kung hahabulin ko pa ba siya o kung palalayain ko na lang siya. Ang hirap kasi isipin na habang mahal na mahal ko siya, siya naman, pumayag na ikasal sa iba. Hindi ko rin alam kung may laban pa ba ako kung mismong pamilya niya ang pumipilit sa kanya. Sa totoo lang, ang sakit-sakit. Para akong walang halaga.
Alam mo ‘yung pakiramdam na ginawa mo ang lahat para maging maayos ang relasyon ninyo, tapos sa huli, hindi pala sapat? Hindi ko alam kung saan ako nagkulang. Hindi ko rin alam kung paano ko tatanggapin na ibang babae ang papakasalan niya. At hindi lang basta girlfriend—engaged na sila. May petsa na ng kasal. Habang sinusulat ko ‘to, naiiyak ako. Kasi ang totoo, mahal ko pa rin siya. Ayoko siyang mawala. Pero paano ko ipaglalaban kung mukhang hindi na ako ang pinipili niya?
Kaya ngayon, humihingi ako ng payo. Ano ba ang dapat kong gawin? Ipaglaban ko pa ba siya? May pag-asa pa ba ako? O kailangan ko na siyang pakawalan kahit ang sakit-sakit? Ayoko nang lokohin ang sarili ko, pero ayoko ring sumuko nang hindi lumalaban. Ang gulo ng isip ko. Sana matulungan n’yo ako kasi hindi ko na alam kung saan ako magsisimula kung mawawala siya sa buhay ko.
