Ang bangkay ng isang 8-anyos na batang babae ay natagpuan sa isang bakanteng lote sa Barangay Sta. Lucia, Novaliches, Quezon City nitong Linggo ng hapon. Ayon sa mga opisyal, mga residente ang nakadiskubre sa katawan ng biktima na walang saplot.
Lumabas sa imbestigasyon na huling nakitang buhay ang bata bandang alas-2:34 ng hapon noong Sabado habang naglalakad kasama ang isang 13-anyos na binatilyo na tinuturong suspek. Sa salaysay ng suspek, inamin niyang sinakal niya ang bata hanggang mawalan ito ng malay at saka isinakatuparan ang balak niya.
Gayunman, duda ang mga opisyal na mag-isa lang nagawa ng binatilyo ang krimen dahil sa kondisyon ng lugar at presensya ng kandadong gate. Binanggit din ng suspek na may kasama siyang 19-anyos na lalaki bago ang insidente at may nagbanta umano sa kanya. Kasalukuyan nang iniimbestigahan ng pulisya ang sinasabing kasabwat at ang isa pang taong binanggit ng binatilyo.
Nasa kustodiya na ngayon ng pulisya ang 13-anyos na suspek habang patuloy ang paghahanap sa iba pang sangkot. Nangako ang lokal na pamahalaan ng Quezon City na sisiguruhin ang hustisya para sa pamilya ng biktima at magbibigay ng tulong sa kanila sa pamamagitan ng Social Services Development Department (SSDD).
