Ang apat na Chinese national ay inaresto matapos umano nilang dukutin ang kapwa nila Tsino sa isang resort sa Parañaque, ayon sa Philippine National Police (PNP).
Ayon kay PNP Chief Gen. Nicolas Torre III, nadakip ang mga suspek ng Anti-Kidnapping Group (AKG) noong Agosto 2 matapos makatanggap ng tawag sa 911 mula sa kaibigan ng biktima. Sa imbestigasyon, napag-alamang humingi ng tulong ang biktima, isang 30-anyos na lalaki, para magpadala ng ₱150,000 sa China para sa gamutan ng kanyang ina. Nagbigay siya ng ₱100,000 bilang paunang bayad bago siya hikayatin ng grupo na pumunta sa casino para umano sa mas mataas na palitan ng pera.
Pagdating sa lugar noong Agosto 1, agad na ikinadena ang biktima at tinutukan ng baril. Pinagbabayad siya ng halagang ₱2.8 milyon sa cryptocurrency (50,000 USDT) kapalit ng kanyang kalayaan. Habang nakakulong, nakahiram ng telepono ang biktima at nakapagpadala ng mensahe sa kaibigan, na agad nag-report sa pulisya.
Noong operasyon, limang Tsino ang nahuli ngunit natuklasang wala palang kinalaman ang 19-anyos na babae na kasama ng grupo. Ayon sa pulisya, biktima rin ito ng sindikato. Dagdag ni Torre, ang apat na suspek ay may kaugnayan sa POGO at kilala bilang money changer na gumagamit ng USDT at e-wallet para maglipat ng pera papuntang China.
Kasalukuyang nasa kustodiya ng AKG sa Camp Crame ang mga suspek at isasailalim sa inquest proceedings. Nakikipag-ugnayan na rin ang pulisya sa iba’t ibang ahensya para mabantayan at ma-regulate ang galaw ng mga dayuhan sa bansa.
