Ang mungkahi ni Sen. Erwin Tulfo ay alisin na ang buwanang ayuda ng 4Ps at palitan ito ng pangkabuhayan. Ayon sa kanya, mas makakatulong kung bibigyan ng puhunan ang mga mahihirap kaysa bigyan sila ng limos kada buwan.
Sinabi ni Tulfo na maging ilang 4Ps members ay mas gusto ng pangkabuhayan kaysa buwanang ayuda. Naalala niya noong siya ay DSWD Secretary noong 2022, sinabi ng ilang benepisyaryo na masakit marinig na tinatawag silang tamad at pabigat sa lipunan.
Dagdag pa ng senador, kapag binigyan sila ng puhunan, makakapagsimula sila ng negosyo tulad ng maliit na karinderya, sari-sari store, o pagbenta online. Sa ganitong paraan, makakatulong sila sa ekonomiya at hindi na aasa lang sa ayuda.
Ayon pa kay Tulfo, hindi patas para sa mga low-wage earners gaya ng mga security guard, janitor, at kasambahay na kulang ang sahod pero walang nakukuhang ayuda mula sa gobyerno. Samantalang ang mga 4Ps members ay may buwanang ayuda na umaabot sa ₱1,650.
Plano ni Sen. Tulfo na ihain ang mungkahing ito sa DSWD Secretary Rex Gatchalian at kay Pangulong Marcos sa kanilang pag-uusap. Layunin niya na mas bigyang-diin ang pangkabuhayan kaysa buwanang tulong.