Ang bagyong Emong nagdulot ng malawak na pinsala sa La Union, na umabot sa P102.84 milyon para sa mga proyekto ng imprastruktura ayon sa Provincial Disaster Risk Reduction and Management Council (PDRRMC).
Bukod dito, napinsala rin ang mga pananim at alagang hayop na nagkakahalaga ng P60.69 milyon at P86,900. Dahil dito, idineklarang state of calamity sa lalawigan upang mapabilis ang paglabas ng pondo para sa relief operations at pagkukumpuni ng mga nasira.
Signal No. 4 ang itinaas sa La Union habang nananalasa ang bagyo. Ayon kay Gov. Mario Ortega, maraming bayan gaya ng Bacnotan, Balaoan, Bangar, Bauang, Luna, San Gabriel, San Juan at Sudipen ang nakaranas ng brownout dahil sa mga natumbang puno at poste.
Tinatayang 36,076 pamilya o 107,097 katao ang naapektuhan at 360 bahay ang nasira. Kasalukuyang isinasagawa ang clearing operations at power restoration.
Sa ibang lugar, kabilang ang Benguet at Negros, umabot din sa daan-daang milyong piso ang pinsala sa agrikultura at imprastruktura. Sa Negros, tatlong katao ang nasawi at mahigit 149,000 pamilya ang naapektuhan. Dahil dito, state of calamity din ang idineklara at may ipinatupad na price freeze sa mga pangunahing bilihin.
