Ang galit sa China ay sumiklab matapos lumabas ang balita tungkol sa sekswal na mapagsamantalang larawan ng kababaihan na kumalat sa mga Telegram chat group na may daan-daang libong miyembro. Ayon sa ulat ng Southern Daily, ang grupong tinatawag na “MaskPark tree hole forum” ay nagbahagi ng mga larawan at video ng kababaihan na sikretong kinunan, kabilang ang mga nasa pampublikong palikuran.
Ang mga larawan at video ay kinuha gamit ang pinhole cameras at ipinagbenta sa loob ng chat group. May mga miyembro ring nag-post ng pribadong larawan ng kanilang dating kasintahan at maging ng kanilang pamilya. Sa social media platform na Weibo, umabot na sa mahigit 270 milyong views ang mga kaugnay na hashtag, na nagpapakita ng lawak ng isyu.
Ayon sa ulat, nagbebenta rin ang ilang user ng mga bagay tulad ng insenso holder na may nakatagong kamera upang makakuha ng sikretong footage ng mga babae. Sinabi ni Huang Simin, isang abogado na dalubhasa sa mga kasong sekswal na karahasan, na maraming babae ngayon ang nakakaramdam ng takot at kawalan ng proteksyon sa batas.
Bagama’t tinanggal na ang pangunahing forum ng MaskPark, may mga sub-group pa ring aktibo sa Telegram. Ipinahayag ng Telegram na ipinagbabawal nila ang ganitong uri ng content at patuloy silang nag-aalis ng non-consensual pornography. Gayunpaman, nananatiling hamon sa mga awtoridad ang pag-usig sa mga sangkot dahil sa encryption ng Telegram at ang pagho-host nito sa labas ng China.
Maraming netizen ang naghahambing ng insidenteng ito sa Nth Room scandal ng South Korea, ngunit mas laganap umano ang kaso ng MaskPark dahil ginagawa ito para sa kasiyahan at hindi para kumita. Nanawagan ang mga eksperto ng mas mahigpit na batas laban sa voyeurism at pagpapakalat ng non-consensual images upang mas maprotektahan ang kababaihan laban sa ganitong uri ng pang-aabuso.
