Ang isang residente ng Coconino County, Arizona ay namatay dahil sa pneumonic plague, ayon sa ulat ng Coconino County Health and Human Services. Ito ang unang naitalang pagkamatay mula sa sakit na ito sa U.S. mula pa noong 2007. Sinasabing nagkaroon ng contact ang pasyente sa isang patay na hayop na may taglay na bakterya.
Ayon kay Patrice Horstman ng Coconino County Board, "Nakikiramay kami sa pamilya ng biktima sa oras ng kanilang pagdadalamhati." Hindi na ibinahagi ang iba pang detalye bilang respeto sa pamilya.
Ang plague ay isang sakit na dulot ng Yersinia pestis, isang uri ng bacteria. Maaaring makuha ito mula sa kagat ng infected na pulgas o sa pakikisalamuha sa hayop na may sakit. Bagamat kayang gamutin ng antibiotics, mahalaga ang maagang gamutan upang maiwasan ang malubhang epekto.
May iba't ibang uri ng plague tulad ng bubonic at septicemic, ngunit ang pneumonic plague ang pinakadelikado. Ito lang ang uri ng plague na naipapasa mula sa tao sa tao sa pamamagitan ng ubo o laway.
Ang mga karaniwang sintomas ng plague ay lagnat, pananakit ng ulo, at pagkapagod. Sa kaso ng pneumonic plague, maaaring makaranas ng hirap sa paghinga, ubo, pananakit ng dibdib, at pag-ubo ng dugo o tubig. Sa kabila nito, sinabi ng Coconino County na mababa ang panganib ng pagkalat sa publiko.
