Ang National Union of Peoples’ Lawyers (NUPL) ay nanawagan ng pananagutan sa pulis matapos arestuhin ang 81-anyos na retiradong tekniko na si Prudencio Cebu “Tatay Pruding” Calubid Jr. Dinakip siya sa kanyang bahay sa Olongapo City noong Disyembre matapos siyang mapagkamalang peace consultant ng NDFP na nawawala na mula 2006. Ayon sa NUPL, hindi lang basta simpleng maling pagkilala ito, kundi sinadyang misidentification na may kinalaman sa bounty system.
Nagpetisyon sa korte ang anak niyang si Analyn para mapalaya siya, at sinabi niyang may malinaw na ebidensya na hindi siya ang taong nasa wanted list. Inutos ng Court of Appeals na agad siyang palayain dahil hindi man lang sinuri ng pulisya kung siya nga ba ang taong may mga kasong kriminal at warrant of arrest.
NUPL binigyang-diin na ang pag-aresto kay Calubid ay bunga ng P7.8 milyong bounty para sa kanyang ka- namesake. Sa ganitong sistema, ang mga pulis ay inuudyukan na habulin ang mga “resulta” imbes na tunay na hustisya. Dahil dito, naaabuso ang pondo ng taumbayan at natatapakan ang karapatan ng mga inosente.
Tinukoy rin ng grupo na hindi ito ang unang beses na nangyari. Katulad ito ng kaso ni Rolly Panesa, isang security guard na maling inaresto at pinahirapan matapos mapagkamalang miyembro ng NPA na may mataas ding patong sa ulo. Dagdag ng NUPL, ganitong mga insidente ang nagdudulot ng takot at kawalan ng tiwala sa mga dapat sana’y tagapagtanggol ng mamamayan.