Ang isang sako ng hinihinalang shabu ay natagpuan sa dalampasigan ng Barangay Chanaryan sa Basco, Batanes noong Hunyo 19. Ayon sa ulat, isang mangingisda ang nakakita ng sako na may lamang 24 vacuum-sealed packs.
May tatak itong "DAGUANYING" at may kabuuang bigat na 24.5 kilo. Tinatayang nasa P166.6 milyon ang halaga nito sa merkado.
Agad itong isinuko sa istasyon ng pulis sa Basco at ngayo’y nasa pangangalaga na ng PDEA Basco Provincial Office. Isasailalim pa ito sa masusing pagsusuri sa laboratoryo ng PDEA Region 2.
Simula noong Hunyo, nasa 1.530 tonelada na ng lumulutang na shabu ang nakuha sa mga baybayin ng Zambales, Pangasinan, at Cagayan, na may halagang humigit-kumulang P9.48 bilyon — ang pinakamalaking drug haul sa kasaysayan ng bansa.
Noong Miyerkules, Pangulong Ferdinand Marcos Jr. ang nanguna sa inspeksyon at pagsunog ng halos 3,000 kilo ng mga nasabat na shabu, marijuana, cocaine, at ecstasy mula sa iba’t ibang panig ng Pilipinas.
