Ang self-rated poverty sa Pilipinas ay bumaba sa 50% ngayong Abril, ayon sa pinakabagong survey ng Social Weather Stations (SWS). Mas mababa ito kumpara sa 55% na naitala sa unang bahagi ng buwan. Katumbas nito ang tinatayang 14.1 milyong pamilyang itinuturing ang sarili nilang mahirap—mas mababa sa dating bilang na 15.5 milyon.
Mas marami ngayon ang nagsabing ‘hindi mahirap’ sila, umaabot na sa 42% mula sa dating 32%. Ito ang pinakamataas na naitalang porsyento ng mga Pilipinong hindi itinuturing ang sarili nilang mahirap. Samantala, bumaba naman sa 8% ang mga nagsabing nasa "borderline" lang sila—ito na rin ang pinakamababang tala sa kategoryang ito.
Sa Metro Manila, ang mga nagsabing hindi sila mahirap ay tumaas sa 60% mula sa 45%. Sa Balance Luzon, umakyat ito sa 51%; sa Mindanao, 29% mula sa 16%; at sa Visayas, 24% mula sa 21%. Ang pinakamataas na self-rated poverty ay nasa Visayas (67%) at Mindanao (61%).
Malaking epekto sa datos ang pagbagsak ng porsyento ng mga nasa "borderline" o yung hindi sigurado kung sila ba'y mahirap o hindi. Mula 30% noong Marso 2024, bumagsak ito sa 12% sa susunod na survey.
Sa kabuuan, mas dumarami na ang mga Pilipinong umaasang gumaganda ang kanilang buhay sa ilalim ng kasalukuyang administrasyon—isang positibong senyales para sa ekonomiya ng bansa.
