Ang isang nanay sa Camarines Sur ay inaresto matapos umanong ibugaw online ang anim niyang menor de edad na anak. Ayon sa ulat ng NBI-Violence Against Women and Children Division (NBI-VAWCD), nakatanggap sila ng impormasyon tungkol sa isang Pinay na nagbebenta ng malalaswang video ng kanyang mga anak sa mga dayuhan.
Nahuli ang suspek sa entrapment operation habang ginagawa ang live show kasama ang mga anak. Ayon kay Atty. Yehlen Agus ng NBI, mula pa noong 2024 ay ginagamit na ng nanay ang kanyang mga anak para sa online show. Kabilang sa mga nasamsam ay limang cellphone na may maseselang larawan at video.
Kumikita umano sila ng $100 o halos P6,000 kada show. Walang trabaho ang parehong magulang kaya ito raw ang naging hanapbuhay nila. Nasagip ng NBI ang anim na bata, kabilang ang bunsong anak na 2 taong gulang.
Iniimbestigahan pa kung biktima rin ng abuso ang bunsong anak. Ayon sa NBI, may malaking epekto ito sa kaisipan ng mga bata. Ang mga ganitong video ay maaaring kumalat online at maging dahilan ng mas malalim na trauma.
Walang piyansa ang mga kasong isinampa sa ina. Kasalukuyang nasa pangangalaga ng city social workers ang mga bata habang sila ay sumasailalim sa counseling para makabangon sa dinanas na pang-aabuso.
