Ang Department of Health (DOH) sa Negros Island Region ay kinumpirma na dalawang lalaki ang namatay dahil sa glanders sa Siquijor. Isa itong sakit na nakukuha sa hayop gaya ng kabayo, kalabaw, at kambing. Pareho silang may sakit gaya ng high blood at diabetes at na-confine sa ospital sa Negros Oriental.
Ayon kay Dr. Nikka Hao ng DOH-NIR, may mga gamot at paraan para makaiwas sa glanders. Bihira raw itong maipasa mula tao sa tao. Ipinapayo rin ng DOH na iwasan ang direktang paghawak sa hayop at pagkain ng karne mula sa may sakit na hayop. May mga simptomas ang glanders gaya ng lagnat, ubo, at pananakit ng katawan.
Patuloy ang surveillance at contact tracing ng DOH kasama ang community visits para makakita agad ng sintomas. Ang pagsusuri sa hayop naman ay pinangungunahan ng Department of Agriculture.
Sa Bohol, naglabas ng abiso ang Provincial Health Office dahil sa pagkakaroon ng mpox (monkeypox) sa ibang probinsya. Ayon kay Dr. Fruserma Mary Uy, kahit wala pang kaso sa Bohol, hinihikayat ang lahat na palakasin ang impormasyon at edukasyon tungkol sa pag-iwas sa mpox.
Dagdag pa ni Dr. Uy, mahalaga ang maagang pagpapakonsulta at pag-iwas sa matataong lugar. Ang mpox ay kayang pigilan at gamutin kung agad maaaksyunan.
