Ang 29-anyos na si Fiamma Villaverde ay tinamaan ng kisame habang nanonood ng Final Destination: Bloodlines sa Cinema Ocho, La Plata, Argentina noong May 19. Kasama niya noon ang kanyang 11-anyos na anak at isang kaibigan para ipagdiwang ang kanyang kaarawan.
Hindi nila planong manood ng sine ngunit dahil mas mura ang ticket, naisipan nilang subukan. Habang patapos na ang pelikula, biglang bumagsak ang parte ng kisame mula sa Cinema 4 at tumama kay Villaverde. Akala nila ay parte lang ito ng pelikula pero malakas ang tunog at malaki ang nahulog.
Sa halip na maghintay ng tulong, dumiretso siya sa ticket booth at hiniling na ibalik ang bayad. Aniya, "Paano kung anak ko ang tinamaan sa ulo? Sobrang iresponsable nila!" Nagtamo siya ng mga pasa at sakit sa likod kaya’t nagpa-X-ray. Ayon kay Villaverde, lumala rin ang kanyang anxiety at panic attacks dahil sa insidente.
Maraming social media users ang nagbiro na ito ay isang “5D experience” at para bang naging parte na siya ng pelikula. Ayon sa mga saksi, malalakas na ulan sa lugar ang posibleng dahilan ng pagbagsak ng kisame.
Wala pang pahayag ang sinehan tungkol sa nangyari. Ang Final Destination: Bloodlines ay bagong pelikula sa sikat na horror series matapos ang 14 taon.
