Ang dalawang giant poodle na sina Donki at Guancinale ay namatay matapos sumailalim sa obedience training sa isang dog training center sa Marikina. Ayon sa may-ari, limang araw pa bago ibinalita sa kanila ang pagkamatay ng mga alaga. Laking gulat nila nang malamang inilibing agad ang mga aso nang hindi sila pinapaalam.
Ayon sa may-ari ng mga poodle, heatstroke daw ang dahilan ng pagkamatay ni Donki, ngunit duda siya sa pahayag ng training center. Nakita pa umano ang mukha ng isa sa mga aso na duguan sa mga larawang ipinakita sa kanya. Ang masakit pa, isinilid pa sa sako ng dog food ang labi ng isa sa mga poodle.
Dalawang buwan sana ang training contract ng mga alaga, ngunit humiling pa umano ang trainer ng extension. Umabot sa ₱50,000 ang bayad ng pet owner, base sa magandang reputasyon ng center sa social media. Ipinakita raw ng trainer na tinuturuan niya ang mga alaga ng ilang kilalang influencer.
Handa ang pet owner na magsampa ng reklamo laban sa dog training center. Hindi lang nila ito inilalantad sa social media kundi gusto rin nilang managot sa batas ang may-ari ng center. “Hindi ito basta-basta. Gusto naming makamit ang hustisya para kina Donki at Guancinale,” pahayag niya.
