Ang bagong Senado ay may ‘interesting mix’ ng mga personalidad, ayon sa mga political analyst. Matapos ang halalan noong Mayo 12, aasahan ang pagbabago sa dynamics ng kapangyarihan. Nanalo sina Bong Go, Bam Aquino, Bato Dela Rosa, Kiko Pangilinan, Imee Marcos, at iba pa—na may kanya-kanyang paniniwala’t adbokasiya. Ayon kay Prof. Dennis Coronacion ng UST, hindi ito ‘usual’ na laban ng pro-admin vs pro-Duterte.
Isa sa pinakamabigat na hamon sa bagong Senado ang impeachment trial ni VP Sara Duterte—na nahaharap sa matitinding alegasyon tulad ng korapsyon, pag-abuso sa pondo, at extrajudicial killings. Tanong ngayon: Makakakuha ba siya ng sapat na boto para ma-acquit? Ayon naman kay Prof. Aries Arugay ng UP Diliman, kahit may partido ang mga senador, malaki ang epekto ng public pressure kung malakas ang ebidensya.
Hindi rin nawawala ang tensyon sa pagitan nina Pangulong Marcos at VP Duterte. Dahil dito, mas magiging maingat at mainit ang mga diskusyon sa Senado. Lalo na’t tatlong taon na lang ang 2028 elections, kaya lahat ay mas tutok sa political moves ng isa’t isa. Pero ayon sa mga eksperto, asahan pa rin ang kooperasyon sa mga di-kontrobersyal na panukala tulad ng budget at economic reforms.
Sa larangan ng ekonomiya, marami pa ring kailangang ayusin. Ayon kay economist JC Punongbayan, kailangan ang reporma sa pension, buwis, at edukasyon. Si Bam Aquino ay may magandang track record sa education, habang si Kiko Pangilinan ay focus sa agrikultura. Marami rin sa mga bagong halal tulad nina Tulfo, Villar, at Go ang may layuning palakasin ang kabuhayan at negosyo.
Kahit hindi perpekto ang lineup, may pag-asa. Ayon kay economist Michael Ricafort, mas kaunti na ang mga dinastiya at sikat lang ang dahilan sa pagkapanalo. Magandang senyales din ang pag-angat ng stock market. Ang mahalaga, ayon sa mga eksperto, ay manatiling mapagmatyag at aktibo ang mamamayan. Hindi sapat na bumoto lang—dapat tutukan kung paano ginagampanan ng mga halal ang kanilang tungkulin.
