Ang tatlong katao, kasama ang isang menor de edad, ay nahuli ng PNP-DEG ng NCRPO matapos mahuling nagbebenta ng vape na may marijuana oil sa Roxas Boulevard, Pasay City noong Miyerkules ng gabi.
Ayon kay P/Col. Darwin Miranda ng PNP-Drug Enforcement Unit, nag-ugat ang operasyon mula sa tip tungkol sa ginagawa ng grupo. Nag-surveillance ang mga pulis at nakipag-deal para bumili ng disposable vape na may marijuana oil.
Ikinasa ang buy-bust operation sa Barangay 2 bandang alas-8:00 ng gabi. Nang maabot na ang bayad, agad dinakip ang mga suspek matapos maibigay ang vape sa pulis na nagpanggap na buyer.
Nakumpiska mula sa kanila ang mga vape na may halagang P138,000. Ang batang suspek ay nasa pangangalaga na ng DSWD, habang ang dalawang kasama niya ay nakakulong sa PDEG detention cell.
Mahaharap sila sa kaso dahil sa paglabag sa RA 9165 o Comprehensive Dangerous Drugs Act of 2002. Patuloy pa rin ang imbestigasyon sa grupo para matukoy kung may iba pa silang kasabwat.
