Inihain ni Sandro Marcos, anak ng Pangulo at House Majority Leader, ang panukalang batas na naglalayong alisin ang travel tax sa bansa. Ayon sa kanya, hindi na ito nakatutulong at sa halip ay nagpapabigat sa mga pamilyang Pilipino at nagpapabagal sa pag-unlad ng turismo.
Sa kanyang pahayag noong Pebrero 4, 2026, sinabi ni Marcos na ang travel tax ay pumipigil sa mga pamilyang Pilipino na gamitin ang kanilang limitadong resources para sa pangunahing pangangailangan o simpleng paglalakbay upang magtrabaho, makipagkita sa pamilya, o samantalahin ang iba pang oportunidad. "Kapag mas mahal ang biyahe, mas kaunti ang gumagalaw, mas kaunti ang gumagastos, at mas kaunti ang oportunidad na umiikot sa ekonomiya." dagdag pa niya.
Ipinaliwanag din ni Marcos na dapat ay pawalang-bisa ang Presidential Decree 1183, na ipinatupad noong panahon ng kanyang lolo, si Ferdinand Marcos Sr., kasama ang binagong Tourism Act ng 2009, upang tanggalin ang fixed travel taxes sa mga Pilipinong biyahero. Binanggit niya na ang kasalukuyang travel tax ay sumasalungat sa 2022 ASEAN Tourism Agreement, na naglalayong alisin ang mga buwis sa paglalakbay para mas mapadali ang inter-ASEAN travel.
Ayon sa kanya, ang mga programa ng gobyerno ay dapat pondohan sa pamamagitan ng transparent budgeting, hindi sa mga singil na labis na nagpapahirap sa mga biyahero. Sa kasalukuyan, ang Philippines lamang sa Southeast Asia ang naniningil ng travel tax sa sariling mamamayan, mula P1,620 hanggang P2,700 depende sa klase ng upuan. Ang bahagi ng koleksyon ay napupunta sa TIEZA, CHED, at National Commission for Culture and the Arts para sa turismo at edukasyon.
Naniniwala si Marcos na ang pagtanggal ng travel tax ay mag-uudyok ng mas maraming domestic at international travel, na magpapasigla sa sektor ng turismo tulad ng hotels, transportation, tours, at retail. "Ang paglalakbay ay hindi luho para sa maraming Pilipino. Bahagi ito ng koneksyon ng pamilya at kabuhayan ng mga manggagawa," pagtatapos niya. Ang panukala ay inihain sa panahon na mariing kinondena ng publiko ang pamahalaan dahil sa pag-udyok na magbiyahe sa loob ng bansa kahit na mas mahal ito kumpara sa paglalakbay sa ibang bansa.