Ang P60 bilyon na pondo ng PhilHealth ay posibleng naidikit sa kuwestiyonableng flood control projects, ayon sa ulat. Sinabi na ang paglipat ng malaking halaga sa Bureau of Treasury (BTr) ang nagbukas ng daan para mailabas ang pondo mula sa unprogrammed appropriations.
Base sa Department of Finance Circular 003-2023, ang BTr ay magbibigay ng sertipikasyon sa Department of Budget and Management (DBM). Ito ang nagiging batayan para mailabas ang pondo para sa mga proyektong flood control.
Sa kabuuan, umabot sa P141 bilyon ang inilabas na pondo para sa flood control projects noong 2023 at 2024. Kabilang dito ang P34 bilyon noong 2023 at P107 bilyon noong 2024. Ang P107 bilyon para sa 2024 ay ibinase sa available na special allotment release order (SARO).
Inutusan ni Pangulong Marcos na ibalik ng BTr ang P60 bilyon sa PhilHealth. Sinabi ng DBM na maibabalik ang pondo sa pamamagitan ng 2026 national budget. Ngunit ilang grupo ang tumutol, dahil para sa kanila, para itong pagtulak sa taxpayers na bayaran muli ang perang nawawala dahil sa scam.
Nagsagawa rin ng protesta ang humigit-kumulang 2,000 katao na pinangunahan ng Kilusan Kontra Kurakot Pampanga, na nanawagan na dapat manggaling ang bayad sa mga nakasuhan at napatunayang sangkot sa flood control scam, at hindi sa pondo ng bayan.
