Ang abogado na si Harry Roque ay itinanggi ang kumakalat na tsismis na siya umano’y inaresto sa Netherlands dahil sa kanyang human trafficking case na may kaugnayan sa isang POGO hub. Ayon kay Roque, wala umanong katotohanan sa mga balitang ito at nakatakda pa nga siyang lumipad patungong Vienna, Austria ngayong Nobyembre 25.
Sinabi naman ni Interior Secretary Jonvic Remulla na wala silang opisyal na abiso mula sa Netherlands tungkol sa sinasabing pag-aresto kay Roque, kahit na naglabas na ang pamahalaan ng isang Red Notice na nagbibigay-daan para dakpin siya at ibalik sa Pilipinas. Habang nagaganap ang deliberasyon sa Senado, inusisa rin ni Senate President Vicente Sotto III ang DFA tungkol sa balita, ngunit ayon kay Sen. Imee Marcos, beripikasyon pa lamang ang ginagawa at wala pang natatanggap na impormasyon.
Ayon sa Department of Justice (DOJ), hindi dapat makalabas ng bansa si Roque dahil kinansela na ng korte ang kanyang pasaporte. Ipinaliwanag ni DOJ spokesperson Atty. Polo Martinez na maaari siyang ma-detain sa kahit anong bansa kung naglalakbay nang walang tamang dokumento. Gayunman, nilinaw ng DOJ na walang opisyal na kumpirmasyon tungkol sa pag-aresto o pagbiyahe ni Roque.
Ilan pang pasaporte ang kinansela ng DFA kasama ang kay Herminio Roque Jr., Katherine Cassandra Li Ong, Ronelyn Baterna, Mercides Macabasa, at Dennis Cunanan. Kaugnay nito, humiling din ang pamahalaan ng Interpol Red Notice laban kay Roque upang tulungan ang ibang bansa na hanapin at pansamantalang arestuhin siya.
Mariin pa ring itinanggi ni Roque ang anumang involvement sa human trafficking at abuso sa Lucky South 99 POGO sa Pampanga. Hindi pa rin umuusad ang kaso laban sa kanya dahil wala pang hurisdiksiyon ang korte sa Angeles City. Matatandaang umalis siya ng Pilipinas noong 2024 matapos tanggihan ang pagdalo sa Senate hearings tungkol sa mga POGO na ginagamit umano sa kriminal na aktibidad.
