Ang katahimikan ng San Fernando El Rey Church sa Liloan, Cebu ay nabasag nang matagpuan ang bangkay ng isang babae noong Biyernes ng gabi.
Ayon kay Police LtCol. Dindo Alaras ng Liloan Police Station, nasa edad 30 ang biktima. May dugo ito sa ilong, sugat sa likod ng ulo, at mga itim na marka sa leeg. Pinaniniwalaang nagkaroon ng pisikalan sa loob ng simbahan bago siya namatay.
Isang nagtitinda ng kandila ang nakarinig ng sigaw ng babae bago natagpuan ang katawan. May mga saksi rin na nakakita sa biktima kasama ang isang lalaki matapos ang misa. Sinubukan pa siyang dalhin sa ospital ngunit idineklara siyang patay pagdating doon.
Patuloy ang imbestigasyon ng mga pulis gamit ang CCTV ng simbahan, habang may hot pursuit operation para mahanap ang suspek.
Ipinahayag ni Cebu Archbishop Alberto Uy ang pansamantalang pagsasara ng simbahan bilang respeto sa pangyayari. Nagpaabot din ng pakikiramay ang parokya at kinondena ang marahas na krimen sa loob ng bahay-dasalan.
