Ang Senado ay nagpasya na walang shortcut sa pag-apruba ng 2026 national budget. Ayon kay Senate President Vicente Sotto III, ayaw ni Pangulong Ferdinand Marcos Jr. na i-certify ang budget bilang urgent. Ibig sabihin, dadaan ito sa normal na proseso ng second at third reading para masuri nang mabuti ang mga detalye.
Sinabi ni Sotto na gusto ng Pangulo na may sapat na oras ang mga mambabatas para basahin at pag-aralan kung tama ang lahat ng nakalagay sa budget. Dagdag pa niya, ayaw ng Pangulo na i-shortcut ang three-day rule sa Kongreso at Senado.
Ipinaliwanag din ni Sotto na iiwasan ng Senado ang paggamit ng unprogrammed funds o pondo na magagamit lang kapag may bagong kita o utang ang gobyerno. Tanging foreign-assisted projects lang ang posibleng isama. Noong nakaraang mga budget, ang pondo rito ay ginamit sa mga flood control projects na iniimbestigahan ngayon dahil sa alegasyon ng korapsyon.
Bukod dito, sinabi ni Sotto na hindi dapat makaapekto ang mga usap-usapang coup plot laban sa kanya sa trabaho ng Senado. Pansamantalang walang plenary sessions hanggang Oktubre 10 para bigyang-daan ang patuloy na budget hearings ng mga komite.
