Ang POP MART, kilalang Chinese toymaker, ay nakaranas ng malaking pagbagsak sa stock na halos 9% sa Hong Kong. Ang pagbaba ay nagbura ng mahigit ₱757 bilyon sa value ng kumpanya matapos ibaba ng isang malaking bangko ang kanilang rating. Maraming nagtatanong kung humihina na ba ang Labubu craze na dating nagpasikat sa brand.
Sa kabila nito, malakas pa rin ang kita ng kumpanya. Sa unang kalahati ng 2025, kumita ang “Monsters” series kasama si Labubu ng higit ₱39 bilyon, tumaas ng higit 600% kumpara noong nakaraang taon. Kabuuang kita ng POP MART ay higit doble, patunay na matatag pa rin ang demand ng mga fans.
Isa pang dahilan ng pagbaba ay ang pagbaba ng presyo sa secondary market. Sadyang tinaasan ng POP MART ang produksyon para mapababa ang presyo at mas maging accessible sa mga tunay na fans, hindi lang sa mga scalpers. Pero dahil dito, humina ang tiwala ng ilang investors na nakadepende sa mataas na resale value.
Sa kabila ng volatility, nananatili ang long-term vision ng kumpanya. Nakatakda silang maglunsad ng Labubu animated series at palawakin pa ang global market. Kahit bumagsak, ang stock ng POP MART ay tumaas pa rin ng higit 180% ngayong taon, nananatiling top performer sa merkado.
