Ang aksidente ay naganap sa Aritao, Nueva Vizcaya nang bumigay ang bahagi ng Benguet-Nueva Vizcaya Road nitong Biyernes ng umaga. Nahulog sa bangin ang isang jeep na may kargang mga kamatis, dahilan para masugatan ang driver at pahinante nito.
Ayon sa ulat ng Aritao DRRM Office, nangyari ang insidente bandang alas-5:50 ng umaga sa Brgy. Kirang, Purok 3. Natapos lamang ang paggawa ng nasabing kalsada nitong Mayo 2025.
Pinaniniwalaang lumambot ang lupa sa ilalim ng kalsada kaya nagkaroon ng pagguho. Dahil dito, tuluyang bumigay ang bahagi ng daan at sumalpok sa bangin ang jeep.
Sa ngayon, isang lane na lang ng kalsada ang maaaring madaanan ng mga motorista habang inaayos ang nasirang bahagi.
Ang jeep ay may kargang panindang kamatis na nagkakahalaga ng humigit-kumulang ₱50,000, na nadamay rin sa aksidente.
