Ang isang Pilipino na may green card ay inaresto sa Long Beach, California noong Biyernes matapos umanong magpadala ng pera sa teroristang grupo na Islamic State of Iraq and Syria (ISIS).
Kinilala ang suspek na si Mark Lorenzo Villanueva, 28 anyos, na nahaharap ngayon sa kasong pagtangkang magbigay ng suporta sa isang banyagang teroristang grupo. Kung mapatunayang nagkasala, maaari siyang makulong ng hanggang 20 taon.
Batay sa imbestigasyon, nagpadala umano si Villanueva ng 12 bayad na umabot sa ₱94,000 (katumbas ng $1,615) sa loob ng limang buwan gamit ang Western Union. Ang perang ito ay ipinadala sa dalawang tao na pinaniniwalaang konektado sa mga miyembro ng ISIS sa ibang bansa.
Ayon sa FBI, nakipag-usap si Villanueva sa social media sa dalawang taong nagsasabing ISIS fighters sila. Sa kanilang pag-uusap, sinabi umano ni Villanueva na "Karangalan ang lumaban at mamatay para sa ating pananampalataya. Ito ang pinakamagandang paraan para makapunta sa langit." Dagdag pa rito, sinabi rin niyang may bomba at mga kutsilyo siya. Nang arestuhin, nakakita ang FBI ng bagay na kahawig ng bomba sa kanyang silid.
Ipinaalala ng mga awtoridad na ito ay pawang mga alegasyon lamang at itinuturing na inosente si Villanueva hanggang mapatunayan sa korte.
